Amu lu silenziu
chi mi fascia lu senziu
e duci si abbannuna supra di mia
c’un suspiru di puisia;
amu lu silenziu
chi mi grapi li vrazza
e m'incupuna
sutta scialli di rasu,
sutta veli e giumma
e mi porta luntanu
supra pinni di palumma.

Amu li nichi paisi
cu casi furmichi
e strati majsi:
si veni lu misi
d’agustu,
di cavudu giustu
ca nuddu passa
e tutti li cosi
parinu pusati
supra na matassa di cuttuni;
e l’omini, all’umbra e all’ammucciuni
si fannu un pinnicuni;
e dorminu l’animali ntra li staddi
e nun cantanu li gaddi
e nun sonanu li campani
ca li sagristani,
puru iddi,
addummisciuti comu picciriddi
(dominus vobiscum)
si godinu lu friscu
all’umbra santa di li sagristii.

Amu la morti
chi senza scrusciu di porti
trasi dintra li casi
e cu li manu di fata
(né vista né tuccata)
chiudi l’occhi, la vucca,
e leggi t’accarizza li capiddi
la frunti, li masciddi,
e ti sicca lu chiantu
e ti fa biancu biancu comu un santu,
e cu li manu ‘ncruci
ti duna tanta luci
e ti grapi li celi
cu na vasata duci comu meli:
amu la morti
la cchiù silinziusa di tuttu...